又到中秋

时间真系过的好快，斩下眼就已经嚟到9月，呢个礼拜日就已经系中秋喇。一直以嚟都几钟意中秋。仲记得细个时每逢到咗呢个时候，大街小巷都会见到好多灯笼、月饼同埋猪笼包。嗰阵时嘅灯笼全部都系用玻璃纸做嘅，冇依家嘅咁先进，而且上美术班嘅时候，眯士通常都会教我哋点做灯笼。除咗灯笼，我哋仲会搞蜡烛，即系点到成见屋周围都系蜡烛，啲烛光闪下闪下，感觉好开心啰。

人依家大咗，虽然仲系好钟意节日嘅气氛，但系就已经冇以前咁期待同埋兴奋，只不过系觉得呢日会比平时有少少唔同，其他就一切如常。有时谂谂下，都会好怀念细个时种无忧无虑嘅生活，除咗返学之外，哈哈。加阵嘅中秋，令我最期待嘅就系莫过于月饼啦，我净系食一种月饼嘅啫，就系冰皮莲蓉，仲要系冇黄嗰只，因为觉得粒黄好难食，而且有黄仲会少咗好多莲蓉，唔划算。不过今年嘅月饼卖得好贵，讲紧嘅系有牌子嘅月饼，一粒普普通通都要十几蚊，成盒就要五、六十蚊，都会好心痛架。又冇人送月饼俾我食，贵都冇办法，咪唯有自己买啰。