随时候命

一直以嚟都好唔钟意stand by，嗰种公司唔知几时会忽然间call嚟叫你返工种滋味一啲都唔好受。尤其是系半夜三更你瞓紧觉嘅时候，电话突然间响起将你吓醒，跟住就“噫噫哦哦”咁应承佢，有时连自己噏乜都唔知。接咗call后有时仲会有几粒钟嘅时间俾你准备又或者瞓返落去，如果唔好彩last minute call嚟嘅话就要嗱嗱声准备，有时仲赶到你要生要死。如果万一赶唔切又或者瞓过咙miss咗班机，即系MIA(Missing In Action)嘅话，就要做好晒心里准备返公司等住俾人“照肺”。好彩嘅话可能净系叫你写封explanation letter，跟住将佢放入你嘅file度，即系bad record；一个唔好彩嘅话仲要remove你2 weeks嘅flight，跟住叫你stand by两个礼拜当系punishment。哗! 大佬! Stand by两个礼拜，日日都提心吊胆唔知几时会call嚟叫你返工，点顶啊?

起初我都唔明点解我唔report sick但系就要帮report sick嘅人顶flight，我明白大家有病请假系好平常，但都唔系咁架，report sick当系食生菜，一句辛苦、一句约咗人、一句有节目、一句好攰、一句冇心情，话唔返工就唔返工就有啲过分啰。但系越做越耐就发觉公司根本唔会appreciate你唔report sick，咁大间公司连勤工奖都冇，个个都系咁report sick，一攞到啲烂机、臭机、衰机就猛咁你report sick，佢又report sick，点解我要帮你哋顶? 好喇，谂住尽吓做员工嘅责任帮公司做，点知公司就永远都睇唔到你对公司做嘅好嘢，仲系觉得你系应分嘅添，万一一个唔好彩衰咗啲乜嘢嘅话，就嗱嗱声DI(Discipline Inquiry)同埋 record入你嘅file度，简直不知所谓! 证明咗一样嘢，同呢间公司，只可以讲金，系唔可以讲心嘅!

初初都以为返工冇乜事唔请病假系应该嘅，就算系医生有时话要俾MC我，我都话唔驶。原来呢种心态喺呢一行系完全错晒嘅!!! 解决办法只有一个，就系我都要report sick啦!!!

好喇，就呻住咁多先。今晚就要飞去中东，系我最唔钟意嘅flight之一，而且仲系头尾7日嘅航班添，先到Dubai跟住再飞去Beirut(即系Lebanon嘅首都)，Dubai鬼死咁热，啲中东人又乞人憎，食嘅嘢又唔啱我口味兼今日仲系weekend添，觉得好懒，超级唔想去。唉! 算喇，人始终都系要向现实低头，睇钱分上，杀你。虽然好唔愿意，但系都要讲声，Dubai，我嚟喇! 各位，下个星期六再见喇!