行情好静

喺伦敦返咗嚟三日都冇打个电话返怡保，所以寻晚就拨咗个轮返屋企俾阿爸阿妈，问吓佢哋呢几日点同埋有咩嘢要买，够唔够钱驶。我阿妈嘅身子一向以嚟都唔系咁好，所以谂住买啲好嘢同埋补品，等我返怡保时可以攞俾佢哋食。唔知点解，买俾阿爸阿妈啲嘢就算好贵我都好舍得，唔会觉得心痛，可能因为佢哋好辛苦将我养大，所以加阵轮到我照顾返佢哋。

问吓老斗呢排啲生意点啊，佢话生意越嚟越难做，有时开成日铺净系得几百蚊生意额，扣除埋本钱同埋啲灯油电火，净系啱啱好够围皮，好多店铺都喺度吊紧盐水。佢问我吉隆坡行情点，我就话唔会比怡保好好多，都系好紧要静。我同佢讲都咁大年纪咯，捱咗几十年，都应该系时候休息吓，唔驶做得咁辛苦，最紧要系照顾好身子啰。

自从油价起咗之后，发觉好多嘢都跟住起价，尤其是系食嘅嘢，几乎全部都起晒价。啲人民嘅支出又越嚟越大，身边好多朋友都同我讲啲钱越嚟越唔够驶，以前可能一个月打3百蚊车油，加阵可能要5百。车油起咗价对我嚟讲影响唔系好大，因为返工放工都有公司车载，所以悭返好多车油钱。但系对于日日都要揸车返工嘅朋友嚟讲，我都明白佢哋嘅苦况嘅。出亲街都要用到钱，toll啦、parking啦、又要供保险、供车、供屋、astro、水电费… 样样都系钱，唔悭啲驶嘅话分分钟会仆街。加上加阵政局又咁乱水，打开报纸，睇到嘅唔系鸡奸，就系蒙古女，ben屎事件等，今日你踢我一脚，听日我插你一刀，啲丑闻越出越新鲜，越出越劲爆，真系好似喺度睇紧港剧咁，即系乜? 咪就系日日追啰。“百拉”同埋“拿吉”要成啖心机咁应付呢啲咁嘅丑闻，又担心自己地位不保，仲边有时间嚟搞好国家啲经济喇，最后受苦嘅，咪又系我哋呢啲无辜嘅平民百姓。有乜计啫? 咪唯有缩紧啲裤头过日子啰。