空服员的碎碎念

同事们快啲嚟睇啊! 讲晒我哋啲心声出嚟架!!!

* 行李箧已执咗差唔多五年几。
* 但系每次望住嗰两个凌乱嘅大小黑，都会有立刻想辞职嘅冲动。
* 明知今日放入去啲嘢，听日又要重新攞出嚟，而后日又要重新摆返入去。
* 由我屋企揸车去到pick up point大约要15分钟，塞车嘅话可能要30分钟。
* 由pick up point再去到机场另外要40分钟，前后一共要一粒钟。
* 喺车入边唔系听歌就系瞓觉。
* 到咗FMB，signed in，checked folder，去洗手间执吓个样，跟住就去briefing。
* 由FMB去到机场大厅，要先经过一条长长嘅行人天桥。
* 每次拖住个行李箧行喺天桥时，脑海中都会闪过"将啲行李箧通通都丢喺天桥底，跟住转身返屋企"嘅念头。
* 老实讲，我唔钟意要著制服嘅工作。
* 因为有好多人会望住你，觉得好唔自然。
* 著casual wear就最好喇，做起嘢上嚟都方便啲。
* 如果冇干洗服务，我都唔知点清理啲红酒或咖啡渍。
* 公司俾我攞嚟洗制服嘅laundry allowance，我通通用嚟买嘢食。
* 听咗"N"年公司话要change uniform，要换全新嘅形象，但系到今日为止依然乜动静都冇。
* Purser嘅uniform都已经换咗喇，几时轮到我哋做细嘅换啊?
* 新嘅uniform可唔可以系T-shirt配牛仔裤?
* 仲要系低腰嗰只。
* 返工时著有型有款嘅衫裤系我内心小小嘅愿望。
* 我唔可以飞早上十点之前嘅航班，因为会好眼瞓。
* 早上八点之前嘅机仲犀利，成个人好似活喺脑残游记嘅世界，混混沌沌。
* 早上飞行前嘅简布会议，只要一直微笑点头扮做乖巧小猫咪就啱喇。
* 仲要记住摆出一副"我最了解嘅事情就系飞行安全喇"个样。
* 再暗暗祈祷大佬或着大家姐千祈咪问到我，我早上谂唔到嘢，乜都唔知架!
* 最惊嘅就系当我发紧梦时，忽然间大佬或着大家姐一句杀埋嚟:"Chris, you as a door 3 primary crew today，in case of aircraft crash land，what is your command and what should you do?" 吓? 我俾你吓醒咗! 你嗡乜啊? 我脑仲瞓紧觉，咩都听唔到，谂唔到吖!
* 唔识答嘅话就只好扮乖，讲:"I’m so sorry，I will take note，I will improve next time。"
* 我最憎就系攞住只行李箧从飞机底嘅铁楼梯行上飞机。
* 记得有一次我只鞋喺楼梯度跌咗落去，由楼梯边一直跌到飞机底。
* 最后要劳动飞机工程师帮我去执鞋，觉得好唔好意思。
* 上咗飞机，手忙脚乱。
* 对住阿哥或着阿姐讲:"My safety checked and no defect。"
* Check meal、check tray、check special meal、check service equipment、check、check、check... 麻鬼烦。
* 乘客登机时，喉咙会自动播放"welcome on board"十万次。
* 人哋笑得咁甜，又早晨又good evening，衰衰哋都俾啲反应嚟咧，好冇?
* 唔钟意公司嘅boarding music，有一首仲夹杂住海鸥声同埋海浪声，听咗都想瞓。
* 最好系播杨千桦、古巨基、陈奕迅、容祖儿、周杰伦、蔡依琳、飞轮海啲歌。
* 又或者系Madonna、Britney Spears、Rihanna、Mariah Carey、Beyonce都得。
* 再唔系滨崎步、仓木麻衣、安室奈美惠、幸田来未、中岛美嘉、清水翔太、平井堅、神话、东方神起、金范秀、申盛勋都可以。
* "唔好意思先生，麻烦你先坐低，好吗?"
* "唔好意思小姐，麻烦你俾后边啲乘客过先，好吗?"
* 如果你系个大男人，可唔可以唔好叫我帮你棒行李啊?
* 身高得5尺6嘅我，手臂唔系铁做嘅，就算身高6尺都唔系啦!
* 公司讲到明棒行李唔系我哋嘅job嚟嘅，我帮你系人情，唔帮你系道理，吹咩?
* 有啲乘客好鬼奇怪，将啲行李棒上去就话好重，冇力搬，要人帮手；但系喺landing时，自己就可以一个人将啲行李棒晒落嚟...
* 如果你知个行李重，自己棒唔到，就咪放咁多嘢落去啰，死蠢!
* 谂住想悭钱唔想寄舱嘅话，就乖乖哋自己棒。
* 明知重自己又唔肯棒，要人帮你棒嘅话，我就唯有对唔住啰: OFF LOAD! OFF LOAD!! OFF OFF OFF OFF OFF OFF OFF LOAD啊!!!
* 最嬲就系有人叫我将豆腐润咁细嘅手袋放入overhead compartment度。
* 阿老佛爷啊，我想问你，呢个动作真系有咁难咩? 你自己做唔到咩?
* 好想将佢哋嘅手袋掉翻转，然后将入边啲嘢倒晒出嚟...
* 当然最后我梗系乐意帮忙啦，我哋系以客为尊嘅服务业嘛。(好假!)
* 请遵守飞行安全守则，否则嘅话我哋可以将你赶落飞机。
* 俾towel时，至嬲就系有人:"俾张branket我! 我要水、我要果汁、我要可乐、我要啤牌、我要.. 我要.. 我要..."
* 我要你哋全部收声啊!
* 乜你哋冇睇到我一只手攞tong，一只手攞紧tray咩? 唔通要我用大臂倒水挟啤牌俾你哋啊?
* 好啦，好啦，可以俾嘅，全部都俾晒你哋啦!
* 唔好同我马后炮，要乜嘢请一次过讲晒。
* 唔好俾咗一张branket你之后，又同我讲，我要多一张，要我行两轮。
* 要命嘅话，就同我乖乖哋睇緊急逃生示範帶，我知道其实冇乜人睇。
* 飞机起飞，尴尬咁坐喺乘客对面。
* 间唔中笑一下，费事俾人话我面臭臭。
* 假装望住窗口出边，连四目交接都唔驶。
* 除咗要做机舱广播之外，我永远唔会记得机长嘅名。
* 嗰啲餐车，都系贱骨头，你唔踢佢哋，个门系永远都唔会闩嘅。
* 空服员系体力劳动阶层。
* 唔系买花赞花香，我公司嘅蒜蓉包，真系好好食--不过好肥~
* 派餐前都会食一个，先开始工作。
* 冇时间食嘅话，个人会好唔爽，边个都唔得阻我食面包，阻我者死!!
* 望住成个basket嘅面包，感觉好满足。
* 遇到麻烦客，就好想将啲面包揸烂佢，然后攞啲包碎，掟佢!
* 我心理变态，我知道。
* 咪埋怨飞机餐难食，飞机餐难食，系地球上众所周知嘅事。
* "Excuse me Sir，today we are serving sweet sour chicken with rice and black pepper beef with noodles，which one you prefer?
* "I want fish。" 撞鬼啰! 唔通我有失忆症? 又或者你哋有妄想症? 我有讲serve fish咩?
* "Sorry sir，today we have 2 choices only，chicken rice and beef noodles。Which one u like?"
* "Beef la! Beef la!"
* 唔好问我点解冇西瓜汁、士多啤梨汁、西柚汁等等。
* 想饮嘅话，请你落机后移步到卫星大厦，Dome cafe，Deli France，Burger King等紧你。
* 有啲客讲过话要饮利宾纳、horlicks、参蜜、chocolate frappuccino、豆奶、珍珠奶茶、热橙汁、朱古力奶...
* 我听过最痴线嘅，系要饮芒果西米捞。
* 我听过最劲爆嘅，系--"唔该俾个椰青嚟。"
* 请皇上你攞张机票出嚟睇睇，奴才呢间公司叫Malaysia Airlines，唔系Mcdonalds Airlines。
* 餐唔balance嘅时候最可怕，派到最后，一定会有个choice冇晒咗，跟住后边啲客就冇得揀。
* 又系say sorry嘅时候。
* "Miss，真系唔好意思，鸡肉饭已经派晒咗，请问你牛肉面可以吗?"
* "....."，成块面黑晒。
* "Miss，真系唔好意思，请问牛肉面可以吗?"
* "我唔食啦! 你哋啲服务真系差! 又话5 star airline，边度有咁样架? 坐后边就冇饭食!"
* "小姐，冇饭食我哋有俾面你食吖。"
* 虽然仲系笑笑口,，但系心入边就喺度闹紧你 -- 你真系一个非洲和尚! 即系乜? 咪就系乞(黑)人憎(僧)啰!
* "我唔理啊! 我一定要食饭。"
* 小姐，乜你谂住厨房真系有个"大厨"或者"後鑊"啊? 可以要食乜就有乜啊?
* 派完餐后仲要做多两轮咖啡同茶。
* 茶壶系一种人间利器。
* 要练手瓜嘅话，只要派多几次咖啡同茶就得架喇，包保你肌肉发达。
* "点解你哋间公司呢样又冇，嗰样又冇架?"
* 公司为咗慳钱，呢样又cut cost，嗰样又cut cost，你闹我都冇用嘎，间公司又唔系我老豆开嘅。
* 啱啱出嚟飞俾啲客闹，心入边难过到要死，仲试过想喊添。
* 加阵嘛，遇到乜嘢腥风血雨，脸上一律挂住超假甜美专业笑容。
* 口中念念有词咁赔罪，"对唔住啊、非常之抱歉、我会谂办法解决…"，如玩绕口令。
* 有时啲客闹到词穷时，我心入边就会帮佢哋将闹人啲台词接落去。
* 有时我更加会玩超级无敌马拉松，就比如:
* "次次轮到我都冇晒鸡肉饭个饭啊，饭桶系我哋个哋啊，地下唔可以放行李个李啊，你哋个电视成日坏个坏啊，坏咗我都冇办法个法啊，法国人成日饮晒啲红酒个酒啊，走得快好世界个界啊，介唔介意食牛肉面个面啊，面对住你哋我想呕个呕啊…"
* 好喇，我够喇。
* 唔好问我今日系星期几又或者几多号，我唔可能答得出嚟，我只系记得做完班机后有几多日off day。
* 我净系记得20号出roster，25号出粮。
* 呢个月我有10日off day，再有可能变成12日。嘿嘿...
* 呢份工作其实好消耗能量。
* 一直念、一直念，暂时恐怕会一直飞落去。
* 时光飞逝，人老珠黄，我就嚟会变成空中阿伯。
* 飞咗就快要6年喇，依然觉得飞行系一件好奇妙嘅事。
* 如果有一日我真系唔做，仍然会好怀念飞行嘅日子。