美味园 Mid Valley + 冇变 + 阿菲新海报

美味园 Mid Valley

早排同friends嚟呢间为于谷中城ground floor嘅美味园食dinner. Selling point系住家饭, 不过我就觉得味道嘛嘛, 冇乜特别原因嘅话都唔会特别想到番去帮衬.





*************************************************************************************
冇变

呢一排周不时都撞番好多好耐冇见又或者失去联络嘅朋友. 大家都讲虽然咁耐冇见, 但系我嘅样依然冇乜点变到, 所以一眼就可以认得我. 其实有时喺度谂, 咁样会唔会系一件好事咧? 当你一直keep住咁嘅样, 但系人始终都系会老, 会残架嘛, 正如如妃所讲: "即使家阵多麼鮮豔, 都有花殘粉退嘅一日, 可以留得住風華正茂咩?"

有时候见到啲老p, 年老色衰, 几十岁冇人要, 仲要俾啲后生一辈喺背后嘲笑、奚落、指指点点一番(尤其是p把口特别衰, 特别臭), 都觉得佢哋好阴公, 心谂自己唔知会唔会有咁嘅一日咧? 如果有一日当你变老咗嘅时候, 好自然market value就会越嚟越细, 到时候唔知会唔会好难接受咧? 又或者可以好潇洒咁一笑置之, 接受现实? 再唔系又再或者应当趁后生嘅时候及时行乐? 俗语有云: 人生得意須盡歡 莫使金樽空對月. 当你人老猪黄嘅时候, 就系你有心无力嘅时候..

一字记之曰: 要得到男人嘅心, 最下乘嘅方法就系千依百順, 咁樣會讓男人覺得索而無味; 中乘嘅方法系若即若離, 讓男人覺得可望而不可及; 最上乘嘅方法就系求而不得..

呢句嘢---绝!!!



*************************************************************************************
阿菲新海报



呢张系阿菲演唱会第二波宣传海报, 依然都系一个字--型!

热辣辣的杜拜 + 生日礼物

热辣辣的杜拜

早前做咗转6日Dubai/Beirut航班, 虽然话班机唔算好长, 由KL直航到Dubai只需7个钟, 但系你哋知架喇, 中东机一向都唔容易做, 系after印度机之后排名第二最难顶嘅航班. 如果大家有serve过中东客嘅话, 都应该知道佢哋有几难搞..

一直以嚟都冇乜钟意中东呢个地方, 除咗对啲中东人冇乜好感, 同时又觉得佢哋有少少变态兼恐怖之外, 令一个原因就系好热、热、热!! 喂! 大佬! 平均温度40度以上, 一出去即刻变成鐵木真打仔--大汗耷細汗, 搞唔好分分钟皮肤被晒伤仲会中暑添, 你都咪话唔少嘢. 而且又冇嘢做, 闷到飞天. 购物商场嚟嚟去去都系咁嘅样, 虽然话啲商场越起越大间、越起越靓, 但系啲嘢都买唔落手嘅, 因为真系好贵、好贵. 同一样物品嘅价钱比起大马平均多出两三成, 唔值得. 上网仲衰! 呢个网站又NO ACCESS, 嗰个网站又BLOCKED, 结果?? Scan到净番啲真系"干净到一尘不染"嘅website先可以access! 算数! 熄机煲碟好过~

喺Dubai night stop, 公司安排我哋入住Hyatt Regency Hotel, 都算系唔话得架啦. 间酒店真系好靓好豪华, 而且location又好, 座落喺市中心, 去边度都方便.

酒店门口嘅logo.

间酒店里面仲有一个溜冰场添, 认真夸张!

间房几正, 张床仲好soft. 入到房间第一件一定要做嘅事就系较恒个冷气~

厕所都靓过人.

酒店lobby.


自从发生咗金融危机之后, 杜拜嘅发展真系大不如前, 好多商店都冷清清, 拍烏蠅. 风光不再. 听讲好多公司都冇钱出粮俾啲员工, 大多数啲员工都系外劳, 通常都系来自印度、巴基斯坦、菲律宾等比较贫穷嘅国家. 梗系喇, 早几年咁样嚟烧钱法, 又要世界最高、世界最大, 你估你国家真系印银纸嘅咩? 仲夸口话要取代香港成为亚洲金融中心, 唉~ 谈何容易啊?



反正冇事做, 就同crew members一齐去新开嘅Dubai Mall度hea下. 呢个系间Mall入面其中一个我好钟意嘅装修, 简直型爆啊!

咁正嘅背景, 梗系要影番张相啦~ V~

另一个屋顶嘅design, 都系好型~

Dubai Mall入面嘅Burj Dubai模型.

Comparison with other buildings, it's the tallest in the world.



Burj Dubai系目前全球最高嘅建筑, 楼高808米, 座落Dubai Mall隔离. 我个人认为, 同我哋嘅KL Twin Towers比较起嚟, 有好多相似嘅地方, 摆到明就系抄袭Twin Towers嘅设计理念. 第一: 两座大楼都拥有超大型购物广场. 第二: 都系连住一个人工湖. 第三: 同样一样有喷泉. 第四: 同样一样有个水族馆. 你哋话系有咁啱得咁橋吖又抑或系copy from Twin Towers嘅concept咧? 虽然话系世界最高, 但系我始终觉得成个建筑物好似一碌蔗咁, 高高直直, 毫冇线条美可言; 反而我哋嘅Twin Towers会比Burj Dubai靓同埋型得多..


迟啲应该可以上去参观, 因为暂时仲未对外开放.


隔离嘅Dubai Mall, 又系一个名店云集嘅地方, 同一般Dubai其他嘅Mall冇乜分别.

不过话是话, 个view又真系几靓个噃.. 好有地中海fu~


艳遇: 话说我哋间酒店同Thai Airways crew住嘅酒店系share同一个shuttle bus去Dubai Mall. 咁嗰日个shuttle载咗TG crew之后先至载我哋. 上咗车冇几耐我就发觉有条几唔错嘅Thai周不时转头望过嚟仲同我笑, 可能对方友善, 咁出于礼貌我都要同人哋笑番, 我都觉得好正常. 当到咗Dubai Mall之后就大家各有各行. 行行下我忽然间发觉佢出现喺我背后, 我都吓到下. 跟住佢好直接咁自我介绍, blah blah blah... 讲讲下佢就入正题, 问等阵返个阵时可唔可以drop by我嘅酒店, 因为佢想参观吓我嘅房间(有冇搞错啊? 咁旧嘅桥都仲有人用..) 我心谂都估到你架喇, 讲咗咁耐, 终于都嚟到戏肉喇. 虽然话佢嘅样都算几好, 但系唔知点解我始终对Tom Yam冇乜兴趣, 如果系好似Chinese嘅Thai Chinese我应该冇问题. Anyway, 中华料理、Sushi同埋Kim Chi始终都系我嘅首选, 其他种族我真系冇乜兴趣. 尤其时Nasi lemak同埋Roti Canai我仲会立刻turn OFF添.. :p

*************************************************************************************
生日礼物


呢架相机系今年收到最大份嘅生日礼物, 仲喺度研究紧点用, 有边位仁兄可以赐教下小弟?

又见香港4 - 澳门

又见香港已经嚟到最后一篇啦, 呢日我哋过大海去澳门, 其实最主要都系参观上次我哋嚟唔切冇时间参观嘅地方. 第一站我哋嚟到妈祖阁.

妈祖阁(A-Ma Temple)相传建于1488年, 庙宇依崖而建, 庙内供奉大海守护神妈祖, 有大约500年历史, 系澳门现存庙宇中有实物可考嘅最古老庙宇. 间庙主要由4座建筑组成.

妈祖阁嘅大门、牌坊、正殿、弘仁殿、观音阁排成直线, 沿住山崖往上行, 可以见到唔少嘅石刻.


供奉天后嘅弘仁殿, 系全庙历史最悠久嘅建筑, 由石窟开凿而成.

妈祖阁内到处都可以见到石刻题字.




东望洋炮台(Guia Fortress) - 东望洋山系澳门半岛最高嘅山峰, 而山顶嘅东望洋炮台修建于1622年. 上有灯塔、圣母雪地殿教堂同埋防空洞3组建筑物, 与大三巴附近嘅大炮台遥遥相对, 系澳门嘅标志. 东望洋灯塔系中国海岸第一座现代灯塔, 旁边嘅小教堂属罗马式建筑, 墙身厚重, 室内嘅壁画揉合咗中西方嘅艺术风格, 喺澳门教堂中可谓独一无二.


东望洋灯塔于1864年建成, 系远东区第一座灯塔, 目前仍然操作, 其所在位置系澳门于世界地图上嘅座标, 其重要程度可想而知.

炮台入口处上方, 放咗一只大海锚, 但点解会放喺度? 就连旅客中心嘅姐姐都唔知.


炮台于1638年建成, 目的为抵抗荷兰军队.


呢个位于大三巴草堆街嘅档口仔虽然毫不起眼..

但系佢嘅煎釀三寶好食到令我停唔到口, 食完又再食.. 正过香港嗰啲多多声~

又见香港3 - 迪士尼 + 一額汗港姐决赛 + 2010香港先生预测

又见香港3 - 迪士尼

基本上呢日嘅行程几乎全日都系喺迪士尼入面度过, 亦都系我第一次游览香港迪士尼. 如果同其他嘅迪士尼乐园比较, 我觉得香港迪士尼真系好细, 而且唔好玩. 大部分嘅游客都系内地嘅朋友, 所以时不时都可以听到有人喺度高声呼叫倾偈, 感觉好似去咗街市咁.






迪士尼游行騷, 我觉得唔好睇之余仲有一个好肉酸嘅白雪公主.




飞天大象, 勾起好多童年时嘅回忆.

Adventure Land, 但系我一啲都feel唔到冒险嘅感觉.




嗯... 呢度我只会嚟一次, 应该唔会再有下次.




Sing and Delius go to Disneyland as well.


*************************************************************************************
一額汗港姐决赛

上两个礼拜为咗睇港姐final, 虽然系星期日, 但依然好乖咁留喺屋企度睇直播. 个show开始还可以, 但越到后面就惊喜连连, 真系一面睇就一面抹冷汗..

以下系今年嘅港姐结果:

冠軍：13號陳庭欣
亞軍：15號張秀文
季軍：5號莊思明
最上鏡小姐：9號李雪瑩
國際親善小姐：13號陳庭欣

今年大会司仪飞咗Amigo, 换咗当红得令嘅福禄寿, 再加上港姐司仪台柱阿叻同埋曾志伟, 合五人之力力挽每况愈下嘅港姐收视. 老实讲, 今年嘅质素比起旧年又真系好好多, 都几平均, 有好几个都系大热, 都好有机会跑出. 以为喺咁嘅情况之下, 班评判都会几难拣, 点知唔系, 一啲都唔难, 因为佢哋全部拣晒啲原本以为冇乜機會嘅...

Part 1: 自我介绍

呢part几正, 佈景門一開, 班候选佳丽喺門後擺好甫士一个个行出嚟自我介绍, 同埋讲下点解自己可以攞冠军嘅理由. 经过TVB再精心执过之后, 班佳丽果然省镜咗好多. 几乎个个都好有自信, 冇边几个行差踏错. 其中2号同10号表现好好, 好有台型.

Part 2: 低B儿歌环节



都唔知点解TVB要做呢part, 要班港姐著晒娃娃裙扮细路女我觉得有少少搞笑囉. 话晒港姐都系要高贵嘅形象, 点知整呢part出嚟就spoilt咗, 仲要佢哋擺埋啲白痴甫士. 唉~

Part 3: Catwalk

呢部分其实几好睇, 班佳丽著晒唔同嘅服装表演自选花生騷, 算系几有新意. 只不过嫌班准港姐啲手势稍微多咗啲. 其中10号表现好好, 其实佢件衫真系好难carry到, 不过以佢5尺9寸嘅身高嚟讲, 梗系冇难度喇, 台型够, 样又靓, 简直就似成个专业模特儿. 另外8号个樣真系超哂班, 够自信兼嗰下单眼, 令人昏晒大浪. 有几个就好嘛嘛, 12号行到好似机械人咁, 硬蹦蹦. 4号扮cool个样令人顶唔顺.

Part 4: 泳装问答



呢part系成晚嘅high light. 其中由王祖蓝扮演嘅女导游阿珍简直令我笑爆嘴!! 个样劲搞笑之余讲啲嘢又抵死, 最惨就系6号林碧珍, 被抢晒风头之余成part只系讲得嗰一句嘢: 我冇欠你架.



Part 5: 歌舞环节 and 历届港姐致敬

摆明车马就系林峰个人騷, 搞到吳卓羲好似个大配角咁. 不过我觉得徐子姗真系越嚟越索~
我記得以前請啲表演嘉賓, 都係同候選港姐一齊, 一邊跳舞一邊拖住佢哋嘅手介紹港姐, 點解依家好似冇咗呢樣嘢嘅?



近呢几届都会有呢个环节. 有好多年过四十嘅前辈港姐仲靓过一班妹妹仔港姐添, 其中89年冠军陈法容真系keep得好好, 二十年前同二十年后嘅样貌身材竟然冇乜点变到.. 真系唔知佢点keep, 再加上佢嗰句: 一日港姐! 一世港姐! 哼! 邊個夠佢威啊!!

黃浩然唔系歌手都无话可说啦, 话晒都算做系歌手嘅郑嘉颖真系唱得好难听囉..

Part 6: 8强

当8强宣布嘅时候, 先至系眼镜开始爆裂嘅时候.

1)3号張藝婷 - 第一个被嗌出嚟. 我真系成个人傻咗! 有冇搞错?? 佢入圍已經系好牽強, 仲可以入到8强添? 個樣包底, 女生男相, 件猪扒憑咩入到8强? 我真系唔明!

2)4號文凱玲 - 呢个还可以.

3)5號莊思明 - 讲真, 佢嘅"達摩髮型"真系吓死人! TVB点解要咁玩佢? 虽然有啲紧张, 但系谈吐都几OK.

4)8號彭慧中 - 真系好sweet, 好sweet嘅佳丽. 大热门之一, 预咗佢会入, 仲会系4强人马, 点知... 我都好意外! 如果话佢矮嘅话, 既然同屬5尺3嘅9號都入到4強, 佢有乜理由入唔到先?

5)9號李雪瑩 - 问答系几ok, 几淡定. 8强算系咁架喇.

6)10號馬均怡 - 同8号彭慧中一樣, 係今屆輸得最唔抵嘅佳丽. 我横谂掂谂都唔知佢输乜. 有样、有身材、有身高、有台型、有大将之风、谈吐又大方、表现又好. 点解? 点解咧? 天理何在? 唉~ 我嘅10号吖10号~

7)13號陳庭欣 - 都估到佢会入8强, 但就誓死都谂唔到佢会去到冠军呢个位置.

8)15號張秀文 - 喺带病之下上阵有咁嘅表现, 都算做唔错架喇. 口才几好, 讲嘢都几风趣幽默.

遗珠: 11号虽然广东话唔正同埋答问题有少少白痴, 但系点都好过3号同9号呱. 2号虽然一副邪牌相, 但系都唔至于入唔到8强呱.

Part 7: 4强

一如以往, 呢part例牌都要请班佳丽讲下佢哋呢几个月里面嘅辛苦法, 讲讲下班佳丽例牌洒几滴眼泪, 跟住就喺亳冇比賽環節下再宣布4強, 再跟住就系连啲无聊问答环节都冇又宣布3甲. 咁点解唔立刻宣布3甲咧? 摆明就系一早已经选咗架啦! Please la, 做戏都做全套啦, 起码中间扮下嘢加插两个无聊对答环节都冇咁肉酸啦~

1) 5號莊思明
2) 9号李雪瑩
3) 13號陳庭欣
4) 15號張秀文

8号同10号同时落马, 睇到呢度已经跌到成地眼镜碎!

Part 8: 赛果



最上镜小姐: 9号李雪瑩. 我谂住应该都会系8号, 点知系隔离嘅9号! 简直系震惊! 而且好難服眾囉! 唔知系咪个妆嘅问题, 个样睇嚟好老. 既然今年有咁多高质素嘅佳丽, 请问有咩可能佢会攞最上镜咧? 又请问班评判觉得佢边一忽系上镜咧?

季軍: 5號莊思明. 佢可以去到季軍真系令我估唔到. 佢嘅"達摩头"惊吓指数真系惊人! 虽然话佢嘅谈吐几大方得体, 但系靓过佢又答得好过佢嘅人大有人在, 我同大家都系一样: 十万个为什么?

亚军: 15號張秀文. 去到呢个位, 都令我好意外. 不过佢嗰晚嘅表现真系几好.

冠军: 13號陳庭欣. 嚟到呢个地步, 都已经冇得拣. 除咗佢之外, 都冇边个有冠军相. 起码有5尺7寸, 仲好过只得5尺3嘅9号李雪瑩. 成晚表现都算四平八稳, 但又唔会特别特出, 笑容系佢最大嘅死穴. 入到冇哂大熱嘅四強, 真係如果唔揀佢都唔知揀邊個..

总结: 今年明明quality几高, 但系点解会揀晒啲最差嘅? "好爆切", 個賽果"我接受唔到囖"!

*************************************************************************************
2010香港先生预测

Right after港姐之后, 紧接落嚟粉墨登场嘅大show就系香港先生, 亦都系大家都好期待嘅城中盛事. 决赛定于8月21号星期六晚晚上8.30pm, 同港姐一样, Astro华丽台都会同步现场直播. 今年嘅港男人数, 由旧年嘅12位减至10位, 同时亦唔会再分成少年组以及盛年组比赛, 而系由10位参赛者直接竞逐香港先生殊荣. 横观今年嘅10位入围"佳丽", 老实讲, 除咗兩三個叫做睇得下之外, 其他嘅"姿色"真系好一般. TVB相关人士表示将为此次比赛增加制作费, 为观众带嚟3D视觉效果欣赏著泳裤、湿身港男, 咁喺呢啲咁嘅3D效果之下, 各參賽者會唔会变得激凸咧? 嗯.. 真系好令人期待, 哈哈~

以下系入围参赛者嘅名单:





年龄: 20
身高: 183cm
体重: 76kg
职业: 学生

讲真, 当我第一次睇到佢嘅时候, 我真系以为佢最起码都会有35岁, 点知睇咗佢嘅profile之后, i was like "Oh my god"! 原来佢只得20岁!! 但系点解佢嘅样咁老成嘅? 我真系幻想唔到如果当佢到咗35岁嘅时候, 佢嘅样会系点? 有"露點柴九"之稱嘅佢, 喺面試時露出單邊胸肌成為焦點. 日前更获选为"至Smart型男". 身形健碩, 喺TVB港男人气榜中高居冠军, 热门马之一.

出线机会: 70%





年龄: 28
身高: 185cm
体重: 76kg
职业: 舞蹈员

来自内地嘅朋友, 能操流利嘅普通话. 最钟意施冧功放生電. 个样嘛嘛, 胜在够高, 但系我始终觉得佢好紧要重"乡土味". 呢种"土味"咁重嘅货色, 班港女应该唔会buy.

出线机会: 0%





年龄: 25
身高: 167cm
体重: 56kg
职业: 服務研習導師

唯一来自马来西亚嘅代表. Sorry都要讲句, 并唔系我唔要支持自己人, 但以佢咁嘅quali, 冇样冇身材, 真系好难令我support佢囉. Malaysia靓仔唔算少, 但系点解会派一件咁嘅次货去参选嘅? 我真系唔明. 可能搞到分分钟啲香港人以为所谓马拉嘅美男就系咁嘅样. 喺TVB港男人气榜中包尾, 唉~ 冇嘢讲!

出线机会: 0%





年龄: 21
身高: 167cm
体重: 64kg
职业: 私人健身教練

前港男冠军袁偉豪嘅好朋友. 有少少似孫耀威, 充滿陽光氣息, 身材劲爆, 事業線惊人, 著起緊身衫之下更加顯得逼爆兼凸點. 身高比较矮, 略為輸蝕, 同埋负面新闻多, 被传媒狂插自恋兼花心! 睇形势, 同10號應該有得爭下. 绝对系我心目中嗰杯茶, 我自己都好嗒佢糖架.. hehe.... bleh... :p


靚仔即系靓仔, 唔使搞乜花臣, 只系輕輕一笑, 就已經跑贏一班乜貨物貨九條街...

出线机会: 80%





年龄: 29
身高: 173cm
体重: 67kg
职业: 表演者

个样算做唔错, 其他方面就普通咗啲, 睇成数都系掹車邊陪跑居多.

出线机会: 20%





年龄: 21
身高: 173cm
体重: 70kg
职业: 学生

来自温哥华, 样几cool, 身形都唔错, 但系就系唔够特出, 系令人"一见即忘"嘅佳丽.

出线机会: 10%





年龄: 24
身高: 178cm
体重: 66kg
职业: 辦公室助理

个样比较成熟, 有高度, 身形几fit, 属于稍微above average嘅货色. 醒醒定定嘅话会系一匹几掂嘅黑马. 不过输咗都冇所谓, 干脆叠埋心水入TVB拍剧.

出线机会: 50%





年龄: 35
身高: 182cm
体重: 72kg
职业: 理財顧問

系今年咁多位参赛港男当中, 年纪最大嘅一位, 所以佬味十足. 身形都几健碩下, 样样都四平八稳, 世界仔一名, 比较钟意特出自己, 即系识搏出位. 未知属于粗獷型嘅佢能否成為評判嘅心水咧? 过去咁多届港男冠军当中, 从来未有一位超过三十岁嘅, 睇下今次劉志偉可唔可以改写历史.

出线机会: 60%





年龄: 18
身高: 174cm
体重: 68kg
职业: 学生

同劉志偉相反, 系今届咁多位参赛港男当中, 年纪最细嘅一位, 仲系應屆會考生, 面试时仲要阿妈陪同. 外型几好, 浑身散发青春魅力嘅佢应该会系好多成熟女人嘅最爱. 不过年纪细, 社会资历尚浅, 可能系佢夺冠嘅绊脚石.

出线机会: 40%





年龄: 25
身高: 178cm
体重: 75kg
职业: 翻譯員

曾经系亞洲先生亞軍, 今次打破宿命顺利入围由TVB举办嘅港男, 算唔算表现TVB作为一个大台应有嘅风度咧? 被媒体形容为笑容似三哥苗僑偉, 系今年嘅大热门. 有外形有高度, 系好多人嘅至爱. 入5强唔会有难度, 我睇好佢分分钟会成为今届嘅票王添. 同4号应该会叮当马头, 相信到时会有一番龙争虎斗, 不过我始终睇好佢会脱颖而出.

出线机会: 90%

今年大會司儀繼續由DoDo姐鄭裕玲領軍, 忠實「粉絲」伍詠薇亦會加入助陣, 加上三位充滿青春活力嘅美女呂慧儀、官恩娜及名模Mandy Lieu, 艷光四射, 与10位型男互相輝映. 我真系好期待港男嘅"台柱"伍姑娘到时嘅表现及反应, 哈哈!

介绍咗咁多, 咁大家又觉得边个会跑出咧?