09香港小姐赛前预测

美丽新力量, 即将要诞生. 一年一度嘅大型选美盛事"香港小姐"即将要开锣, 决赛定于今晚8月22号. 最衰我加阵身在洛杉矶, 所以冇缘观看, 唯有返去睇play back喇. 今年嘅"香港小姐"赛事大缩水, 只有十名参赛者进入最后总决赛, 系历年来人数最少嘅一次. 对此, 无记方面表示并非为咗缩减成本, 亦都唔系因为报名者质素太低而揾唔到人才, 而系"为咗节目需要", 使最终嘅总决赛"更紧凑、更好看". (我个人就觉得个理由好牵强, 最大原因都系要cut cost). 但事实上, 虽然只系选出十名选手入围, 却唔见得"精益求精", 其中唔少佳丽仲被传媒称为"丑女", 甚至有人批评今年嘅港姐整体质素系"史上最差". 想当年港姐惊为天人嘅外貌喺今届候选佳丽中一个都揾唔到.. 老实讲, 唔知系观众要求高咗, 又或者系靓女难求, 港姐嘅质素真系一年不如一年.. 我个人觉得历届港姐之中, 最靓最省镜嘅.. 始终都系88年嘅冠军-李嘉欣. 虽然过咗咁多年, 但系李小姐依然保养有佳, 一企埋一众青春妹妹仔, 又或者啲靓模隔离, 唔但止一啲都唔会输蚀, 而且仲将佢哋比咗落去添.


1号: 曾曦宁
年龄: 23
身高: 5’3
体重: 100 lbs
三圍: 33”-23.5”-34”
职业: 空姐
学历: 大学预科

同我同一行业. 丑闻极多, 被传媒狂插贪慕虚荣, 专向有钱佬落手, 工作时又唔专业, 负面新闻又多. 以无线一向嘅评审准则, 应该会将佢拒于5强之外..


2号: 林洁瑜
年龄: 25
身高: 5’7
体重: 108 lbs
三圍: 33.5”-23.5”-34”
职业: 美容顾问
学历: 大学毕业

被誉为"翻版许愿", 样衰. 但系经过无记入厂执咗之后, 个样又真系掂番咗喎, 而且又有身高, 学历又好, 睇嚟入5强应该有望. 至于三甲就要睇决赛当晚佢嘅临场表现喇.


3号: 郑宝源
年龄: 21
身高: 5’6
体重: 106 lbs
三圍: 34.5”-24.5”-34.5”
职业: 学生
学历: 大学

佢有个朵, 叫做"逼爆徐淑敏". 面试时已经呼之欲出, 但系当泳装拍摄时, 上围好明显缩水, 被人怀疑之前"装假狗", 而且更有橙皮纹, 个样又俾人有一种难登大雅之堂嘅感觉. 咁又未至于冇晒希望, 希望决赛当晚佢会有特出表现喇.


4号: 刘倩婷
年龄: 23
身高: 5’3 .5
体重: 96 lbs
三圍: 32.5”-22.5”-33”
职业: 证券分析员
学历: 大学毕业

论身形, 佢最Fit, 但系亦都系全场最矮. 斯文大方, 一切平平稳稳. 我嘅心水之一, 相信三甲应该会有佢份.


5号: 马咏恩
年龄: 22
身高: 5’5
体重: 106 lbs
三圍: 32.5”-23”-34”
职业: 学生
学历: 大学毕业

同郑秀文一样, 都系属于平胸一族. 个样只系一般, 唔会有令人眼前一亮嘅感觉. 我谂唯一令佢攞到分数嘅, 应该会系佢不俗嘅谈吐表现, 绝对系黑马一匹.


6号: 黄嘉丽
年龄: 24
身高: 5’6
体重: 107 lbs
三圍: 32”-23”-34.5”
职业: 学生
学历: 准博士学生

学历系全场最高嘅, 身形亦都系好fit. 虽然系咁, 其他方面就真系普通过普通, 睇嚟都系陪跑架喇.


7号: 钟溥敏
年龄: 24
身高: 5’8
体重: 116 lbs
三圍: 35”-24”-35.5”
职业: 学生
学历: 大学毕业

哇哇哇!!!! 发生咩事啊? 拍恐怖片啊? 唔该快啲返屋企啦~, 唔好周围走，免得吓亲啲观众..


8号: 熊颖诗
年龄: 25
身高: 5’6
体重: 105 lbs
三圍: 33.5”-23”-34.5”
职业: 市场助理
学历: 大学毕业

我今年嘅令一个心水, 面试时佢个样真系吓我一惊, 但系经过无记一番细心包装后, 个样真系突飞猛进, 状态仲越战越勇添. 虽然拍泳装照时俾人发现有橙皮纹, 而且肚腩仲有摺痕, 但系依然阻止唔到佢个势, 我tip佢会系今年嘅冠军人马.


9号: 袁嘉敏
年龄: 24
身高: 5’4.5
体重: 105 lbs
三圍: 33.5”-22.5”-34”
职业: 电影发行主任
学历: 大学毕业

今年嘅"波神", 虽然平时睇落好似平平无奇, 但系其实禾秆冚珍珠, 唔聲唔聲嚇你一驚, 估计佢嘅上围应该会有D cup. 据闻佢系食雪糕丰胸, 各位女士, 如果有兴趣嘅话可以试一试. 哈哈.. 吳君如系佢嘅提名人, 亦都系任职于娱乐工作, 参选后应该会令佢有更多发展机会.


10号: 李姿敏
年龄: 21
身高: 5’6
体重: 121 lbs
三圍: 34.5”-25”-35”
职业: 学生
学历: 大学

虽然个样几sweet, 但系佢系今年参赛佳丽中嘅肥田!! 条腰粗到足以可以攞嚟做猪腩肉!! 绝对系陪跑份子. 不过我觉得就算落选都应该冇乜所谓, 因为李小姐仲有一条路可行, 就系做纤体代言人.